- ഈദ് സന്ദേശം- ഫാസിസത്തെ പ്രതിരോധിക്കുന്നതിന് ജനങ്ങള്‍ മുന്നിട്ടിറങ്ങുക
SDPI
31 ഓഗസ്റ്റ്‌ 2017
കോഴിക്കോട്: അടുക്കള വരെ എത്തിനില്‍ക്കുന്ന ആര്‍.എസ്.എസ് ഭീകരതക്കെതിരെ ചെറുത്തുനില്‍പ്പ് ശക്തിപ്പെടുത്തുന്നതിന് ജനങ്ങള്‍ മുന്നിട്ടിറങ്ങണമെന്ന് എസ്.ഡി.പി.ഐ സംസ്ഥാന പ്രസിഡന്റ് അബ്ദുല്‍ മജീദ് ഫൈസി ഈദ് സന്ദേശത്തില്‍ പറഞ്ഞു. ഇബ്രാഹീം പ്രവാചകനെ തീ കുണ്ഠത്തിലേക്കെറിഞ്ഞ ഏകാധിപതിയായ ഭരണാധികാരി നംറൂദിനെയാണ് നരേന്ദ്ര മോദിയുടെ ഭരണം അനുസ്മരിപ്പിക്കുന്നത്. എന്നാല്‍ ഭരണകൂട ഭീകരതയെ ധീരമായി നേരിട്ട ഇബ്‌റാഹീമിന് മുമ്പില്‍ തീ കുണ്ഠം സുഖശീതളമായി മാറിയത് ഇരകള്‍ക്ക് ആത്മവിശ്വാസം നല്‍കുന്ന ചരിത്രമാണ്.
മനുഷ്യ ജീവനും ഇന്ത്യന്‍ ഭരണഘടനക്കും പുല്ല് വില കല്‍പ്പിക്കാത്തവര്‍ അധികാരത്തിന്റെ എല്ലാ കുഞ്ചിക സ്ഥാനങ്ങളിലും ഇരുപ്പുറപ്പിച്ച വര്‍ത്തമാന ഇന്ത്യ നേരിടുന്ന പ്രതിസന്ധി നിസ്സാരല്ല. മതസൗഹാര്‍ദ്ദവും മാനവിക ഐക്യവും ദുര്‍ബ്ബലമായി കൊണ്ടിരിക്കുകയാണ്. ന്യൂനപക്ഷ, പിന്നാക്ക സമുദായങ്ങളുടെ ഏകപക്ഷീയമായ കീഴടങ്ങല്‍ ഇന്നുവരെ അക്രമികളുടെ മനസ്സലിയിച്ചിട്ടില്ല. തെരുവില്‍ ക്രൂരമായ തല്ലി കൊലക്ക് വിധേയരാകുന്നവര്‍ക്ക് സംരക്ഷണമൊരുക്കുന്നതില്‍ കമ്മ്യൂണിസ്റ്റ് പ്രസ്ഥാനങ്ങളടക്കം പരാജയപ്പെടുന്നു. ഫാഷിസ്റ്റ് പ്രതിരോധം വാക്കുകളിലൊതുങ്ങേണ്ടതല്ലെന്നും ഇരകളുടെ ഉള്ള് തുറന്ന യോജിപ്പിന് നേതൃപദവിയിലുള്ളവര്‍ മാതൃക കാണിക്കണമെന്നും അബ്ദുല്‍ മജീദ് ഫൈസി അഭ്യര്‍ത്ഥിച്ചു.