ശബരിമല: പോലീസ് നിഷ്‌ക്രിയമാകരുത്: എസ്.ഡി.പി.ഐ
KKP
02 ജനുവരി 2019
തിരുവനന്തപുരം: ശബരിമലയില്‍ സ്ത്രീകള്‍ പ്രവേശിച്ചതിനെ തുടര്‍ന്ന് സംഘപരിവാര്‍ പ്രവര്‍ത്തകര്‍ വ്യാപകമായ അക്രമങ്ങളാണ് സംസ്ഥാനത്ത് നടത്തിക്കൊണ്ടിരിക്കുന്നത്. പൊതുജനങ്ങളില്‍ ഭീതീ പടര്‍ത്തി തെരുവില്‍ അഴിഞ്ഞാടുന്ന അക്രമികളെ നിലക്ക് നിര്‍ത്താന്‍ സര്‍ക്കാര്‍ തയ്യാറാവണമെന്നും പോലിസിന്റെ നിഷ്‌ക്രിയത്വം ഗുരുതരമായ പ്രത്യാഘാതങ്ങള്‍ക്ക് വഴിവെക്കുമെന്നും എ.സ്.ഡി.പിഐ സംസ്ഥാന ജനറല്‍ സെക്രട്ടറി തുളസീധരന്‍ പള്ളിക്കല്‍ പറഞ്ഞു.
പുലര്‍ച്ചെ ശബരിമലയില്‍ യുവതികള്‍ കയറിയതുമായി ബന്ധപ്പെട്ട സ്ഥിരീകരണം മുഖ്യമന്ത്രിതന്നെ നടത്തിയത് സംഘര്‍ഷങ്ങള്‍ക്ക് ആക്കം കൂട്ടുകയാണുണ്ടായത്. ബി.ജെ.പിയുടെ അക്രമങ്ങളെ അമര്‍ച്ച ചെയ്യുന്നതിന് പകരം അവര്‍ക്ക് തെരുവില്‍ അഴിഞ്ഞാടാനുള്ള എല്ലാ അവസരവും പോലീസ് ഒരുക്കുകയാണ്. അപ്രതീക്ഷിതമായി സ്തംഭിച്ചു നില്‍ക്കുന്ന അവസ്ഥയിലാണ് സംസ്ഥാനം ഇപ്പോഴുള്ളത്. സംസ്ഥാന വ്യാപകമായി ഗുരുതരമായ രീതിയില്‍ സംഘര്‍ഷങ്ങളും അക്രമങ്ങളും തേര്‍വാഴ്ചകളും ബി.ജെ.പി നടത്തികൊണ്ടിരിക്കുമ്പോഴും പോലീസും സര്‍ക്കാരും കാഴ്ചക്കാരായി മാറുകയാണ്. കരുനാഗപള്ളിയില്‍ ആര്‍.എസ്.എസ് നടത്തിയ മാര്‍ച്ചില്‍ പ്രത്യേക സമുദായത്തിലെ അംഗങ്ങളുടെ വ്യാപാരസ്ഥാപനങ്ങള്‍ തിരഞ്ഞുപിടിച്ച് ആക്രമിച്ചപ്പോഴും പോലീസ് നോക്കി നില്‍ക്കുകയാണ് ചെയ്തത്. സംഘപരിവാര്‍ സംഘടനകള്‍ പ്രഖ്യാപിച്ചിരിക്കുന്ന ഹര്‍ത്താലിലും അക്രമങ്ങള്‍ തുടരാനുള്ള സാധ്യതകള്‍ കണക്കിലെടുത്തു പോലീസ് സംവിധാനത്തെ കാര്യക്ഷമമാക്കണമെന്നും അദ്ധേഹം ആവശ്യപ്പെട്ടു.