എസ്ഡിപിഐ മുന്‍ ദേശീയ പ്രസിഡന്റ് എ സഈദിന്റെ വേര്‍പാടില്‍ സംസ്ഥാന പ്രസിഡന്റ് പി.അബ്ദുല്‍ മജീദ് ഫൈസി ദുഃഖം രേഖപ്പെടുത്തി
SDPI
02 ഏപ്രില് 2019
കോഴിക്കോട്: എസ്.ഡി.പി.ഐ മുന്‍ ദേശീയ പ്രസിഡന്റും നാഷണല്‍ സെക്രട്ടറിയേറ്റ് അംഗവും പ്രമുഖ പണ്ഡിതനും ചിന്തകനും എഴുത്തുകാരനും വാഗ്മിയുമായ എ സഈദിന്റെ വേര്‍പാടില്‍ എസ്.ഡി.പി.ഐ സംസ്ഥാന പ്രസിഡന്റ് പി.അബ്ദുല്‍ മജീദ് ഫൈസി ദുഃഖം രേഖപ്പെടുത്തി. ഇന്ത്യന്‍ രാഷ്ട്രീയത്തെ കൃത്യമായി നിര്‍വചിച്ച രാഷ്ട്രീയ ചിന്തകനായിരുന്നു. ഇന്ത്യയിലെ മര്‍ദ്ദിത പാര്‍ശ്വ വല്‍കൃത ജനവിഭാഗങ്ങളുടെ സാമൂഹിക അന്തസിനും സുരക്ഷിതത്വത്തിനും ഉയര്‍ത്തെഴുന്നേല്‍പ്പിനും വേണ്ടി രാജ്യ വ്യാപകമായി പ്രയത്നിക്കുകയും പുതു തലമുറക്ക് ആത്മ വിശ്വാസം പകര്‍ന്ന് നല്‍കുകയും ചെയ്ത നേതാവായിരുന്നു. ലളിത ജീവിതത്തിലൂടെ ഒരു പൊതു പ്രവര്‍ത്തകന്റെ മാതൃകാ വ്യക്തിത്വത്തിനുടമയായിരുന്നു അദ്ദേഹം. പശുവിന്റെ പേരില്‍ ന്യൂനപക്ഷങ്ങളെയും ദലിതുകളെയും ഹിന്ദുത്വര്‍ വേട്ടയാടിയപ്പോള്‍ നിര്‍ഭയത്വത്തോടെ ഇരകളുടെ കണ്ണീരൊപ്പാന്‍ ഉത്തരേന്ത്യന്‍ തെരുവുകളില്‍ ഓടി നടന്ന മനുഷ്യസ്നേഹിയായിരുന്നു. അദ്ദേഹത്തിന്റെ വേര്‍പാട് രാജ്യത്തെ ഫാഷിസ്റ്റ് വിരുദ്ധ മുന്നേറ്റങ്ങള്‍ക്കും പാര്‍ശ്വവല്‍കൃത ജനവിഭാഗങ്ങളുടെ വിമോചനപോരാട്ടങ്ങള്‍ക്കും തീരാനഷ്ടമാണെന്നും ഫൈസി കൂട്ടിച്ചേര്‍ത്തു.