ജനജീവിതം ദുസ്സഹമാക്കുന്ന അന്യായ നികുതി വര്‍ധന പിന്‍വലിക്കുക: അജ്മല്‍ ഇസ്മായീല്‍ എസ്ഡിപിഐ പ്രതിഷേധ പരിപാടികള്‍ക്ക് തുടക്കമായി
sdpi
21 മാര്‍ച്ച് 2022
തിരുവനന്തപുരം: ജനജീവിതം ദുസ്സഹമാക്കുന്ന അന്യായ നികുതി വര്‍ധന ഉടന്‍ പിന്‍വലിക്കണമെന്ന് എസ്ഡിപിഐ സംസ്ഥാന ജനറല്‍ സെക്രട്ടറി അജ്മല്‍ ഇസ്മായീല്‍. 'ഇടതുസര്‍ക്കാരിന്റെ ഈ കൊള്ള ഇനിയും ജനങ്ങള്‍ സഹിക്കണമോ ?' എന്ന മുദ്രാവാക്യമുയര്‍ത്തി പാര്‍ട്ടി സംസ്ഥാന വ്യാപകമായി സംഘടിപ്പിക്കുന്ന പ്രതിഷേധ പരിപാടികള്‍ക്ക് തുടക്കമായി. മാര്‍ച്ച് 20 മുതല്‍ 31 വരെ നീളുന്ന പ്രതിഷേധ പരിപാടികളാണ് സംസ്ഥാനത്ത് സംഘടിപ്പിച്ചിട്ടുള്ളത്. പഞ്ചായത്ത് തലത്തില്‍ സര്‍ക്കാര്‍ ഓഫിസിന് മുന്നില്‍ പ്രതിഷേധ പരിപാടി സംഘടിപ്പിക്കും. നിത്യോപയോഗ സാധനങ്ങളുടെയും ഇന്ധനത്തിന്റെയും വിലക്കയറ്റംകൊണ്ട് പൊറുതിമുട്ടുന്ന കേരളജനതയ്ക്ക് മേലുള്ള ഇരുട്ടടിയാണ് ബജറ്റില്‍ പ്രഖ്യാപിച്ച അന്യായ നികുതി വര്‍ധനവ്. അടിസ്ഥാന ഭൂനികുതി പരിഷ്‌കരണം കുറഞ്ഞ അളവില്‍ ഭൂമിയുള്ളവരെയും ബാധിക്കും. നിലവിലെ നികുതിയേക്കാള്‍ ഇരട്ടിയോളമാണ് വര്‍ധന. ബജറ്റ് പ്രസംഗത്തില്‍ പ്രഖ്യാപിച്ച ഹരിത നികുതിയില്‍ നിന്ന് ഡീസല്‍ ഓട്ടോറിക്ഷകളെ ഒഴിവാക്കുമെന്നായിരുന്നു ബജറ്റ് ചര്‍ച്ചയ്ക്കുള്ള മറുപടിയില്‍ ധനമന്ത്രി വ്യക്തമാക്കിയത്. എന്നാല്‍, നിയമസഭ പാസാക്കിയ ധനബില്ലില്‍ ഡീസല്‍ ഓട്ടോറിക്ഷകള്‍ക്ക് 500 രൂപ ഹരിത നികുതി ചുമത്തുകയാണ് ചെയ്തിരിക്കുന്നത്. നികുതി വര്‍ധനയ്ക്കെതിരേ ജനങ്ങളെ ബോധവല്‍കരിക്കുന്നതിന് ഫ്‌ളക്സ് ബോര്‍ഡ്, പോസ്റ്റര്‍, ലഘുലേഖ തുടങ്ങിയവയും പ്രചാരണത്തിന്റെ ഭാഗമായി നടത്തുമെന്നും അജ്മല്‍ ഇസ്മായീല്‍ വ്യക്തമാക്കി.